Episode 2 నిశ్శబ్దపు అడుగులు – పసి మనసులో అలజడి.. 🕯️
ఎపిసోడ్ 2: నిశ్శబ్దపు అడుగులు – పసి మనసులో అలజడి.. 🕯️
తెల్లవారుజామున కోడికూయకముందే నా కళ్లు తెరుచుకున్నాయి. రాత్రి పెట్టిన ఆ సంతకం నా గుండె మీద ఒక పెద్ద బాధ్యతలా కూర్చుంది. పక్కనే నిద్రపోతున్న కార్తీక్ ముఖం ప్రశాంతంగా ఉంది కానీ, స్వరూప్ మాత్రం అటు ఇటు దొర్లుతున్నాడు. వాడు రాత్రి నేను ఆ కాగితం మీద సంతకం పెట్టడం చూశాడు.. ఆ పసి మనసులో ఎన్ని అలజడులో!
నేను వంటగదిలోకి వెళ్తుంటే, స్వరూప్ నెమ్మదిగా నా వెనకాలే వచ్చాడు. వాడి కళ్లు వాచి ఉన్నాయి.వాడు ఏదో అడగాలని నోరు తెరుస్తున్నాడు.. కానీ మళ్ళీ భయంతో వెనక్కి తగ్గుతున్నాడు. వాడి కళ్ళలో వంద ప్రశ్నలు ఉన్నాయి:"అమ్మా.. ఆ సంతకం దేని గురించి? మనం అప్పుల వాళ్ళకి ఇల్లు ఇచ్చేస్తున్నామా?"
"నాన్న ఎందుకు నీతో మాట్లాడటం లేదు? నా వల్లేనా?"
"నేను అడిగిన కరాటే క్లాస్ వల్లే మీ మధ్య గొడవలు అవుతున్నాయా?"
వాడు అడగలేదు.. కానీ ఒక తల్లిగా నాకు ఆ ప్రశ్నలు వినిపిస్తున్నాయి. ఈ తరం పిల్లల దౌర్భాగ్యం ఇదే.. ఇంట్లో గొడవలు జరుగుతుంటే తమ వల్లే ఏమో అని వాళ్ళు లోలోపల కుంగిపోతారు... ఇంతలో
"అమ్మా.." అన్నాడు పిలుపులో వణుకుతో.
"ఏంటి నాన్న? ఎందుకు నిద్రపోలేదు?" అని అడిగాను వాడి తల నిమురుతూ.
"రాత్రి నువ్వు ఆ కాగితం మీద సంతకం పెట్టావు కదా.. అది పెడితే మనం ఈ ఇల్లు వదిలేసి వెళ్ళిపోవాలా?
నాన్న ఎందుకు నీతో మాట్లాడటం లేదు? అందరూ అప్పుల గురించి ఎందుకు అరుస్తున్నారు అమ్మా?" అని అడిగేసరికి నా గొంతులో పచ్చి వెలక్కాయ పడ్డట్టయింది.
నీజమేకదా! మనం అప్పులు చేస్తాం.. మనం ఇబ్బందులు పడతాం. కానీ మన ఇంట్లో ఆ నిశ్శబ్దాన్ని చూసి పిల్లలు ఎంత భయపడతారో మనం ఎప్పుడైనా ఆలోచించామా?
"తల్లిదండ్రుల మధ్య ఉండే మౌనం పిల్లలకి ఒక పెద్ద శిక్ష లాంటిది. మనం సమస్యల గురించి చర్చించుకోకుండా మౌనంగా ఉంటే, ఆ మౌనం పిల్లల మనసులో 'భయం' అనే విషాన్ని నింపుతుంది. అప్పులు తీర్చడం ముఖ్యం కావచ్చు.. కానీ ఆ క్రమంలో పిల్లల చిన్నతనాన్ని బలి ఇవ్వడం అంతకంటే పెద్ద తప్పు."
"పిల్లలు తమ ఇష్టాలను వదులుకుంటున్నారు అంటే దాని అర్థం వాళ్ళకి బుద్ధి వచ్చిందని కాదు.. మన అసమర్థతను చూసి వాళ్ళు జాలిపడుతున్నారని! మీ ఆర్థిక ఇబ్బందుల భారాన్ని పిల్లల మీద వేయకండి.. అది వాళ్ళ మేధస్సుని కాదు, వాళ్ళ ఆత్మవిశ్వాసాన్ని చంపేస్తుంది."
తల్లిగా నా పోరాటం – ఇప్పుడే ఎందుకు?
చాలామంది అడగొచ్చు.. "ఇన్నాళ్లు లేనిది ఇప్పుడు ఎందుకు ఇంత గట్టిగా పట్టుబడుతున్నావు?" అని. ఎందుకంటే.. నా బిడ్డ కళ్ళలో వెలుగు ఆరిపోతోంది. 12 ఏళ్ల వయసులో వాడు "నాకు ఏమీ వద్దు" అంటున్నాడు అంటే.. రేపు వాడు ప్రపంచంతో ఎలా పోటీ పడతాడు?
ఇంట్లో ప్రతి ఒక్కరూ చేస్తున్న తప్పు ఇదే: సర్దుకుపోవడం!
అప్పులు ఉన్నాయి.. నిజమే. ఆదాయం తక్కువ.. నిజమే. కానీ దాని కోసం బిడ్డ భవిష్యత్తును తాకట్టు పెట్టాలా? "మేము ఇలాగే బతికాం కదా, వాడు ఇలాగే బతకాలి" అనుకోవడం ఎంత పెద్ద తప్పు?
ప్రతి ఇంటి కథ – మన తప్పుల చిట్టా:
మీరు వర్క్ కి వెళ్లి వచ్చేసరికి టైమ్ అయిపోయిందని బిడ్డని ఇంట్లో కూర్చోబెడుతున్నారా? అయితే మీరు చేస్తున్నది తప్పు!
మీ ఆర్థిక ఇబ్బందుల వల్ల వాడు క్రీడల్లో రాణించే అవకాశాన్ని పోగొడుతున్నారా? అయితే మీరు చేస్తున్నది తప్పు!
ఈ జనరేషన్ పిల్లలు చాలా సెన్సిటివ్. మనం వాళ్ళకి మంచి బట్టలు, తిండి ఇస్తున్నాం కానీ.. వాళ్ళ మనసుకి కావాల్సిన "పుష్" (Push) ఇవ్వడం లేదు. వాడు స్కూల్లో సాధించిన ఆ చిన్న గవర్నమెంట్ సర్టిఫికేట్ వాడి టాలెంట్ కి నిదర్శనం. ఆ టాలెంట్ ని మనం ఆఫీస్ టైమింగ్స్ సాకుతో తొక్కిపెడుతున్నాం."డబ్బు లేకపోయినా పర్లేదు.. కానీ బిడ్డకు 'నీ వెనక నేనున్నా' అనే ధైర్యం లేకపోతే, ఆ తల్లిదండ్రులు ఓడిపోయినట్టే. మీ డ్యూటీ టైమింగ్స్ కన్నా మీ బిడ్డ టాలెంట్ టైమింగ్స్ ముఖ్యం!"
కొత్త సస్పెన్స్ క్లైమాక్స్:
నా చేతిలో ఉన్న ఆ కాగితం మీద సంతకం.. అది స్వరూప్ నీ కరాటే క్లాస్లో జాయిన్ చేయడానికి నేను తీసుకున్న రిస్క్ కావొచ్చు.. లేక నా నగలు తాకట్టు పెట్టగా వచ్చిన లోన్ పేపర్ కావొచ్చు.. లేక మా పరిస్థితుల నుండి పారిపోవడానికి నేను తీసుకున్న ఒక కఠినమైన నిర్ణయం కావొచ్చు! కానీ ఆ సంతకం మా జీవితాన్ని మార్చబోతోంది.
స్వరూప్ నా దగ్గరకు వచ్చి, "అమ్మా.. ఆ పేపర్ ఏంటి?" అని మళ్ళీ అడిగాడు.
నేను వాడి కళ్ళలోకి చూసి అన్నాను.. "ఇది మన భవిష్యత్తు నాన్న. నీ కలలను, నీ ఆశలను నేను ఆవిరి అవ్వనివ్వను. పద.. మనం ఒక కొత్త ప్రయాణాన్ని మొదలుపెడుతున్నాం!"
ఆయన మౌనంగానే చూస్తున్నారు. ఆ సంతకం గురించి తెలిస్తే ఆయన ఏమంటారు? అసలు ఆ సంతకం దేని మీద? అది మాకు దారి చూపిస్తుందా లేక ఉన్న ప్రశాంతతను కూడా దూరం చేస్తుందా?
Comments
Post a Comment